នៅថ្ងៃទី១២ ខែមិថុនា លោក ង្វៀន ថាញ់ផុង សមាជិកគណៈអចិន្ត្រៃយ៍នៃគណៈកម្មាធិការបក្សខេត្ត និងជាអនុប្រធានប្រចាំការនៃគណៈកម្មាធិការប្រជាជនខេត្តអានយ៉ាង បានរៀបចំក្រុមការងារមួយដើម្បីត្រួតពិនិត្យការអនុវត្តគម្រោងវិនិយោគសាធារណៈ និងជួបប្រជុំជាមួយឃុំចំនួនបួននៅអនុតំបន់ភាគខាងត្បូងនៃខេត្ត រួមមាន ហ្គោក្វាវ ឌិញហ្វា វិញទ្វី និងវិញហ្វាហ៊ឹង។
ក្រុមការងារបានត្រួតពិនិត្យ និងស្ទង់មតិលើគម្រោងវិនិយោគសាធារណៈ រួមមាន៖ គម្រោងលើកកម្ពស់ ជួសជុលទីស្នាក់ការគណៈកម្មាធិការប្រជាជនឃុំឌិញហ្វា និងសំណង់តុចធំបន្ទាប់បន្សំ ដូចជា៖ មណ្ឌលសុខភាពឌិញហ្វា គម្រោងសាងសង់ស្ពានបាហូ ក្នុងឃុំវិញហ្វាហ៊ឹងបាក់ ស្រុកហ្គោក្វាវ (ឥឡូវជាឃុំវិញហ្វាហ៊ឹង) គម្រោងកែលម្អ និងជួសជុលអគារប្រកួតពហុបំណងនៅមជ្ឈមណ្ឌលវប្បធម៌ឃុំហ្គោក្វាវ។
ទន្ទឹមនិងនោះធ្វើការជាមួយមូលដ្ឋាននានា អំពី៖ ស្ថានភាពផ្សព្វផ្សាយផែនការអភិវឌ្ឍន៍សេដ្ឋកិច្ចសង្គមក្នុងរយៈពេលប្រាំខែដំបូងនៃឆ្នាំ ២០២៦។ ល្បឿនផ្សព្វផ្សាយនិងបញ្ចេញថវិកាវិនិយោគសាធារណៈសម្រាប់គម្រោងសាងសង់ជាមូលដ្ឋាន។ ការធ្វើឲ្យជាក់ស្តែងសេចក្តីសម្រេចចិត្តមហាសន្និបាតគ្រប់លំដាប់ថ្នាក់និងភារកិច្ចសំខាន់ៗមួយចំនួននាពេលខាងមុខ។
យោងតាមរបាយការណ៍ ក្នុងរយៈពេលកន្លងមក ការងារណែនាំនិងប្រតិបត្តិការរបស់គណៈកម្មាធិការប្រជាជនឃុំសង្កាត់បានផ្សព្វផ្សាយទាន់ពេល ព្រមៗគ្នា ដោយច្បាមជាប់គោលការណ៍ សេចក្តីសម្រេចចិត្តរបស់មជ្ឈិមនិងខេត្ត។ បណ្តាភារកិច្ចនិងដំណោះស្រាយដែលបានដាក់ចេញជាមូលដ្ឋានមុននោះត្រូវបានអនុវត្តយ៉ាងយកចិត្តទុកដាក់ និងសម្រេចបានលទ្ធផលវិជ្ជមានជាច្រើនក្នុងវិស័យជាច្រើន។
ល្បឿននៃការប្រមូលចំណូលថវិកាសម្រាប់រយៈពេលប្រាំខែដំបូងនៅតាមមូលដ្ឋាននានា ជាទូទៅសម្រេចបានដូចផែនការកំណត់៖ ឃុំឌិញហ្វាសម្រេចបានអត្រាខ្ពស់បំផុតគឺ ៥៨,៧២% បន្ទាប់មកគឺឃុំវិញហ្វាហ៊ឹង ៥៦,២០% ឃុំវិញទ្វី ៤៣,២១% និងឃុំហ្គោក្វាវ ៣១,៥៤%។ គិតត្រឹមថ្ងៃទី១០ ខែមិថុនា ឆ្នាំ២០២៦ ដើមទុនវិនិយោគសាធារណៈជាសរុបដែលបានបញ្ចេញរបស់ឃុំហ្គោក្វាវសម្រេចបាន ៣៦,០៧% ឃុំវិញទ្វីសម្រេចបាន ២៥,៦៧% ឃុំឌិញហ្វាសម្រេចបាន ២៣,២៥% និងឃុំវិញហ្វាហ៊ឹង ១៧,៧៣%។
កំណែទម្រង់រដ្ឋបាល និងការផ្លាស់ប្តូរឌីជីថល បានកត់ត្រាទទួលស្គាល់នូវវឌ្ឍនភាពគួរឲ្យកត់សម្គាល់។ អត្រានៃការកាត់បន្ថយពេលវេលាអនុវត្តនីតិវិធីរដ្ឋបាលនៅក្នុងឃុំនានា សម្រេចបាន ៣០% ដូចដែលគោលដៅបានកំណត់។ សូចនាករសម្រាប់បម្រើប្រជាពលរដ្ឋ និងអាជីវកម្មរហូតដល់ចុងខែឧសភា បានបង្ហាញថា ឃុំទាំងបួនសុទ្ឋតែស្ថិតនៅក្នុងក្រុមឆ្នើម។ យោងតាមនោះ ឃុំឌិញហ្វា ទទួលបាន ៩៥,៩៨% ពិន្ទុ។ ឃុំវិញទ្វី ទទួលបាន ៩៧,៣៦%ពិន្ទុ។ ឃុំហ្គោក្វាវ ទទួលបាន ៩៧,៣២ពិន្ទុ និងឃុំវិញហ្វាហ៊ឹង ទទួលបាន ៩៧,៤២% ពិន្ទុ។
ថ្លែងមតិណែនាំក្នុងកិច្ចប្រជុំ លោក ង្វៀន ថាញ់ផុង អនុប្រធានប្រចាំការនៃគណៈកម្មាធិការប្រជាជនខេត្ត បានស្នើឲ្យគណៈកម្មាធិការបក្ស ក្រុមប្រឹក្សាប្រជាជន និងគណៈកម្មាធិការប្រជាជនឃុំនានា ផ្តោតលើការអនុវត្តដំណោះស្រាយយ៉ាងខ្លាំងក្លា បណ្តាដំណោះស្រាយអនុវត្តសេណារីយ៉ូកំណើនសេដ្ឋកិច្ចសម្រាប់ឆ្នាំ ២០២៦ ដោយខិតខំសម្រេចបាន និងលើសពីគោលដៅសម្រាប់កំណើនសេដ្ឋកិច្ច ចំណូលថវិការដ្ឋ អភិវឌ្ឍសហគ្រាស ដោះស្រាយការងារនិងសូចនាករសេដ្ឋកិច្ចសង្គមផ្សេងទៀតដែលបានប្រគល់។
បន្តទាញយកអត្ថប្រយោជន៍ពីសក្តានុពល និងគុណសម្បត្តិរបស់ឃុំសង្កាត់ប្រកបដោយប្រសិទ្ធភាព។បង្កើនការតភ្ជាប់ និងលើកកម្ពស់តម្លៃនៃផលិតផល OCOP របស់ស្រុកដែលមានលក្ខណៈពិសេស។បំពេញផែនការទូទៅ និងផែនការកំណត់តំបន់លម្អិតឲ្យបានឆាប់រហ័ស ផែនការកំណត់តំបន់តាមសមត្ថកិច្ចរៀបចំផែនការផ្សព្វផ្សាយសម្រាប់ការអនុវត្តផែនការខេត្ត ដោយបង្កើតមូលដ្ឋានទាក់ទាញការវិនិយោគ និងអភិវឌ្ឍយូរអង្វែង។ ជំរុញខ្លាំងការផ្លាស់ប្តូរឌីជីថល និងការអនុវត្តបញ្ញាសិប្បនិម្មិត (AI) ក្នុងការគ្រប់គ្រងរដ្ឋ កំណែទម្រង់រដ្ឋបាល ការផ្តល់សេវាសាធារណៈ និងការគាំទ្រដល់ប្រជាជន និងអាជីវកម្ម។ ជាពិសេសយកចិត្តទុកដាក់ដល់ការកសាងមូលដ្ឋានទិន្នន័យ។
លោក ង្វៀន ថាញ់ផុង អនុប្រធានប្រចាំការនៃគណៈកម្មាធិការប្រជាជនខេត្ត បានតម្រូវឲ្យមូលដ្ឋាននានា បញ្ចប់ការងាររៀបចំការិយាល័យ ផ្នែកនានា និងការរៀបចំសមាជិកភាពនៅថ្នាក់ឃុំ ដើម្បីធានាថាប្រតិបត្តិការរលូន និងមានប្រសិទ្ធភាព។ គណៈកម្មាធិការបក្ស និងគណៈកម្មាធិការប្រជាជននៅថ្នាក់ឃុំ គួរតែជំរុញ និងលើកកម្ពស់ជាប្រចាំនូវការបញ្ចេញថវិកាទុនវិនិយោគសាធារណៈ តាមដានគុណភាព វឌ្ឍនភាព និងប្រសិទ្ធភាពនៃការវិនិយោគសាធារណៈ និងសហការយ៉ាងសកម្មជាមួយមន្ទីរ ផ្នែក ដើម្បីដោះស្រាយការលំបាក និងបញ្ហាទាក់ទិន។
លោក ង្វៀន ថាញ់ហ្វុង អនុប្រធានប្រចាំការនៃគណៈកម្មាធិការប្រជាជនខេត្ត បានសង្កត់ធ្ងន់ថា អ្នកប្រមុខគណៈកម្មាធិការបក្ស និងអាជ្ញាធរមូលដ្ឋានត្រូវក្តាប់ឲ្យបានច្បាស់លាស់អំពីស្ថានភាពនិងច្បាមជាប់ការណែនាំរបស់គណៈកម្មាធិការបក្សខេត្ត គណៈកម្មាធិការប្រជាជនខេត្ត និងពង្រីកតួនាទីនិងភារកិច្ចទទួលខុសត្រូវក្នុងការដឹកនាំ ណែនាំ និងប្រតិបត្តិការ។ បន្តការផ្លាស់ថ្មីខ្លាំងក្លារចនាបថការងារ បង្កើតការរួបរួមផ្ទៃក្នុង បង្កើនព័ត៌មានឃោសនាការ បង្កើតការឯកភាពសម្រាប់ប្រជាជនអំពីកសាងអាជ្ញាធរ និងកែលម្អគុណភាពក្នុងការដោះស្រាយនីតិវិធីរដ្ឋបាល។ ទន្ទឹមនិងនោះ ត្រូវច្បាមជាប់របបព័ត៌មានឃោសនារាយការណ៍និង ជាពិសេសគឺរាយការណ៍អំពីការណ៍លំបាកនិងបញ្ហាទាក់ទិនស្ថិតក្នុងសមត្ថកិច្ចឲ្យបានត្រឹមត្រូវ៕
ប្រែ៖ ណារីពៅ
